| Text | Quo gratantissime audito, mox obsidentibus stuporem et admiracionem induxerunt ob insolitum quod sequitur. Nam manus tendentes ad sydera, cum tubarum et
tympanarum sonitu voces in celum extollunt et terribiles clamores in signum exuberantis leticie. Quod signum cum nonnulli in consistorio militum magnipenderent, affuit Francie marescallus qui hoc totum: ficticium reputans, jurejurando firmavit quod Turci ausi non erant usque ad eos tendere. Jam antea et repetitis vicibus, qui pabulandi gracia cogebantur
longius evagari, eorum adventum perceperant, quia clam de insidiis erumpentes, quosdam gladiis perimebant , fugabant alios; qui redeuntes, cum hec in castris sererent , idem marescallus quosdam affligi fecerat, quosdam exauriculari, causam
dicens quia sic, latrones et proditores pessimi, excercitum terrere vultis verbis vestris inanibus. |
|---|
