| Text | Et me semble, que vous debvez prendre cinq ou six archiers, & autant de ieunes gentilshommes, qui seront en habillements de conseillers, pour envoyer deça & dela, quand vous en aurez affaire: & debvez estre monté sur quelque courtault ou hacquenée, & avoir un paige apres vous, sur un bon moyen cheval, à tout une cornette desployée: affin que si lon avoit affaire à vous, que lon vous sceust ou trouver: & doibt estre ladicte cornette differente aux autres, & que chacun la congnoisse, & iamais ne doibt estre desployée si vous n’y estes: & debvez avoir ausi une trompete que tous autres entendent: affin que quand vous la ferez sonner, soit d’aller ou demeurer, que les autres pareillement respondent: & debvez laisser voz autres chevaulx & paiges en votre lieu, empres vostre lieutenant ou porteur d’enseigne de la bataille ou vous debvez estre: car s’il avenoit quelque chose, trouverez vous voz chevaulx pres, & ce qu’il vous fault: & vous estant armé avecques ledict mareschal, pourrez regarder d’asseoir le camp par bon avis de luy & d’autres saiges. |
|---|
