| Text | Et premierement, des que vous ferez acertené que la bataille vous vient, par raport de voz coureurs ou autrement, vous debvez monstrer bon visaige à voz gents, & leur prier que à ceste fois ils veuillent avoir honneur devant eulx, & si bien combatre, que l’honneur leur en demeure, & point la honte: & leur direz, que vous estes seur, que s’ils veulent faire leur debvoir, que Dieu leur donnera la victoire, & en leur remonstrant qu’ils combatent à bonne querelle, & qu’ils ne doibvent riens craindre, mais estre seurs que Dieu leur aydera: & leur requerre, qu’ils veuillent faire pour ce iour, ainsi que vous estes deliberé de faire: car vous leur monstrez le chemin: & puis debvez mettre vostre ordre. |
|---|
