| Text | Ausi quand viendra la nuict, environ soleil couchant, si le temps le peult porter, tous les navires sont tenus de vous venir faire la reverence, & passer par devant vous, en iectant trois crys l’un apres l’autre, tous ceulx de la nef ensemble. Et s’ils ont trompettes, ou autres instruments, seront tenus de les faire iouer: & au troisiesme cry qu’ils cryeront, vostre maistre de navire est tenu de faire ausi un cry, en leur rendant un salut, avec tous ceulx de vostre nef, & faire sonner voz trompettes & tabourins si vous en avez. Et doibt demander celuy qui vous fera la reverence, le cry de la nuict: & ausi quelles routes vous voulez tenir: à quoy vostre maistre de navir doibt respondre, & luy doibt crier le nom du guet, & la route que vouz voulez tenir: & chacune navire vous en doibt faire autant, & pareillement leur debvez respondre, comme dessus. |
|---|
